ARITZ ARREGI

NORTASUNA MAILEGUAN

 

Nortasuna biluzten ez duzunean,

galdera ikurrek

ezpainak josten dizkizute zeresanen beldur.

 

Ihesi zoaz,

pentsamenduek beldurra sentiarazten dizute

eta ausardia ez da,

barealdi uneetean soinean jarri ohi dugun

doako etiketa besterik.

 

Maite,

egunak daude non sinisten ez duzuna adierazten duzun,

antzeztuz,

ausartak baikara egiaren zorrak defendatzeko orduan.

 

Arren,

irun itzazu zeure sentimenduak.

 

Har ezazu ari bat eta kiribildu,

guztia zeure eskuetan senti dezazun.

Askatu,

eta ikusi zeure begiekin nola,

ustekabean,

korapilo bat sortu den.

 

Zerk sortu duen?

Batu eta askatzen gaituenak.