ARITZ ARREGI

ZATIKETA

 

Bihotzak zatitu ziren,

norabideak,

oraina.

 

Agurrak ahanztura dakar,

galderen zurrunbiloa

pena barruan bueltaka.

 

Ez zenidan hortaz hitz egin.

 

Ezer gutxi eska dakizuket

zure bizitzatik irtenarazi zenidanetik,

baina jakizu,

maitasunaren aldaeretan,

beharrezkoa dela esfortzu

amankomun bat.

 

Ez dut zure begietan beste bat gehiago izan nahi.